घरच्यांचे कौतुक करावे वाटते
ऑफिसात शाबासकी घ्यावी वाटते
इच्छा असते, वेळच नसतो
मनात खूप हुरूप असतो
लाडक्यांचे उत्साहात चाळे
गैरहजेरीतही उत्सुक डोळे
कर्तव्य असते घरदारासाठी
नीतीनियम ऑफिसात पाठी
टुकार काम करायचे नसते
चुकार होऊन चालत नसते
ऑफिसात तन असते दंग
संसारात मन असते गुंग
बॉसपुढे नमायचे असते
बायकोपुढे दमायचे असते
बॉसला कामाने कमवायचे
बायकोला गजऱ्याने रमवायचे
ऑफिसला फार जपायचे असते
संसाराला सांभाळायचे असते
कुरकुर बॉसची ऐकली तरी
हुरहूर भेटीची लागतेच घरी
तारेवरची अजब कसरत
कुणा मुखी न यावी हरकत
बाप रे बाप, किती हा ताप
धावपळीतहि आवरत संताप
कपडा आत कधी फाटका
संसार चालतो तरी नेटका
कामाचा अश्रू दाखवायचा नाही
नामाचा आनंद चुकवायचा नाही
दु:खातही हसत खेळत बाप
तोलत असतो कर्तव्याचे माप ..
.
कोणत्याही टिप्पण्या नाहीत:
टिप्पणी पोस्ट करा