जरि आहे म्हणती येथे सगळीच भल्यांची दुनिया --[गझल]

झिडकारुन संस्काराला बिनधास्त वागणे जमते
सोडुनी सरळ त्या वाटा पळवाट शोधणे जमते

लाभाचे माहित असता ते प्रभातकाळी फिरणे 
घेउनी सूर्य डोक्यावर नेहमी लोळणे जमते

दिसला तो समोर खड्डा डोळ्यांना जर का त्यांच्या 
खोलातही त्यात पडून दुसऱ्यास पाडणे जमते

संगतीत छान रमावे उपदेशहि येई कानी 
चांगल्यास व्यसनाधीन निमिषात बनवणे जमते

जरि आहे म्हणती येथे सगळीच भल्यांची दुनिया 
सत्यास मुलामा खोटा धादांत चढवणे जमते ..
.

कोणत्याही टिप्पण्‍या नाहीत:

टिप्पणी पोस्ट करा