ससा आणि कासव -

पांढरा शुभ्र कापूस जसा
इवला पिटुकला होता ससा

लाजरा बुजरा भित्रा जरा
अवखळ चपळ होता ससा

एकदा मळ्यातून फिरता  फिरता 
गेला तो  तळ्याकाठी तडक
 
इवल्या पिटुकल्या सशाला
दिसला मोठा एक खडक

खुदकन ससा मनात  हसला
ऐटीत खडकावरती  बसला

थोड्या वेळाने झाली गम्मत
सशाला वाटली जम्माडी जम्मत

खडक लागला हलायला
ससोबा लागले डुलायला

अचानक घडले तरी काय
सशाचे थरथरले की पाय

सशाला वाटले झाला भूकंप
त्याच्या अंगाला सुटला कंप

पहिले त्याने पायाखाली
जीव झाला वर खाली

नव्हता पायाखाली खडक
होती कासवाची पाठ टणक

कासवाने हलवली हळूच मुंडी
ससोबाची उडाली घाबरगुंडी

धूम ठोकली सशाने मळ्यात
कासव निघाले निवांत तळ्यात 

कोणत्याही टिप्पण्‍या नाहीत:

टिप्पणी पोस्ट करा