वृत्त- कालगंगा / देवप्रिया
लगावली- गालगागा गालगागा गालगागा गालगा
मात्रा- २६
--------------------------------------------------------आत्मगाथा सांगवेना वाटते भीती मला
ना कुणा ती ऐकवेना वाटते भीती मला..
सागरावर बघ उसळती जीवघेणी वादळे
का किनारा गाठवेना वाटते भीती मला..
ढोलताशा ऐकुनी मज खूप होतो त्रास हो
शांतता पण साहवेना वाटते भीती मला..
वाटले घ्यावा विसावा टेकुनी खांद्यावरी
मार्ग खडतर चालवेना वाटते भीती मला..
माजलो पैशात लोळत चेहरा सुजला किती
आरसाही पाहवेना वाटते भीती मला..
जागणे अन् झोपणे हा फरक नाही राहिला
जीवनाला पेलवेना वाटते भीती मला ..
.
.
कोणत्याही टिप्पण्या नाहीत:
टिप्पणी पोस्ट करा