जनरेशन ग्याप -




बापाने एका टपरीतून बूट खरेदी केले.


घासाघीस पाचवीला पुजलेली असल्याने ती यथासांग केली. 


विक्रेत्याने एक वर्षाची खात्री दिली .



घरी आल्यावर मुलाला बूट दाखवले.

मुलगा- "केवढ्याला ?"

तो - " अरे , फक्त अडीचशेला ! " 


त्याच्या उत्तरातला उत्साह वाखाणण्यासारखा होता.




निर्विकार मुद्रेने मुलाने नुसताच हुंकार दिला.



दुसऱ्या दिवशी मुलाने बूट खरेदी केले. कोपऱ्यात नीट ठेवले .

तो- "केवढ्याला ? "

मुलगा- "फक्त बावीसशेला .. ब्र्यांडेड आहेत ! "

बाप कौतुकाने वा वा म्हणाला .


चार दिवसानंतर .....


दोघेही बापलेक भिजत घरी आले .

दोघांच्याही बुटांच्या तळाला चिखल भरलेला !

दोघांनीही आपापले बूट नळाखाली स्वच्छ घुतले .

बापाने बूट व्यवस्थित कोपऱ्यात ठेवले .



मुलगा बूट आणि त्याचा बाजूला निघालेला तळ...


डोळे विस्फारून पहात होता .



बाप काळजीने त्या तिघांकडे आळीपाळीने पहात होता !


.
.

कोणत्याही टिप्पण्‍या नाहीत:

टिप्पणी पोस्ट करा