क्रांती

 " मी कवी आहे..."- सगळीकडून हे
सगळीकडे जगजाहीर झाले आहे ..

जो तो आपले पाकिट चाचपून पाहत आहे
जमलेच तर पाकिट लपवून ठेवत आहे ..

मी अलिकडून येताना दिसलोच तर  
तो रस्त्याच्या पलीकडून जात आहे ..

मी समोरून येताना दिसताच
तो उलट पावली माघारी फिरत आहे ..

रद्दीवाला येताजाता नमस्कार करत आहे
चहावाला माझी नजर टाळत आहे ..

माझी चाहूल लागताच आंधळा भिकारीदेखील
आपला वाडगा अथवा थाळी पुन्हापुन्हा चाचपून बघत आहे .. 

गद्य लेखक, चारोळीकार, गझलकार हा सगळा वर्ग
अंमळ तुच्छतादर्शक नजरेनेच मजकडे पाहत आहे ..

येणारा जाणारा मला बघून आपल्या खिशात हात घालतो 
आणि स्वतःच्या खिशातले कापसाचे दोन बोळे काढत आहे ..

वरचेवर मी हाडकुळा आणि बायको जाड दिसत आहे
असे दूरूनही पहाणारा कधीतरी भेटलाच तर सांगत आहे ..

नातेवाईकांचे प्रमाण झपाट्याने कमी होत आहे
त्यामुळेच की काय बायको बहुधा खूष आहे ..

पाहुणे आणि मित्र-मंडळींची वर्दळ कमी होत आहे
असे मला एकट्याला उगाच वाटत आहे ..

महिनाअखेरीसही बरीच शिल्लक पडत आहे
असे आतल्या गोटातून मागल्या हाताला समजत आहे ..!
.

कोणत्याही टिप्पण्‍या नाहीत:

टिप्पणी पोस्ट करा