तुजसाठी रडणार न कोणी ..!

 भल्या पहाटे सडा रांगोळी
हीटर गिझर बघा आंघोळी ..

इकडे चहापाण्याची तयारी
तिकडे दप्तर डबा न्याहरी ..
 

ह्यांचे ऑफिस त्यांच्या शाळा
सासू सासरा लावा जिव्हाळा ..

टीव्ही करमणूक दोनच घटका
आल्यागेल्यांचा रागही झटका ..

पहावे इकडे का मी तिकडे
डोळ्यांपुढती सदा साकडे ..

आयता चहा कधी मिळावा
गरम घास तो कधी गिळावा..

सहानुभूती कुणा न वाटे
विश्रांतीस्तव फुटती फाटे ..

कुणास रडगाणे सांगावे
प्रसंग पाहुन शहाणे व्हावे..

दुखणीखुपणी सहन करावी
दु:खी ओवी मनात गावी..

स्त्री जन्मा ही तुझी कहाणी
तुजसाठी रडणार न कोणी ..!
.

कोणत्याही टिप्पण्‍या नाहीत:

टिप्पणी पोस्ट करा