पोरगी ती दूरदेशी शिकत आहे.. [गझल]

वृत्त- मंजुघोषा 
लगावली- गालगागा गालगागा गालगागा 
मात्रा- २१
---------------------------------------------
पोरगी ती दूरदेशी शिकत आहे 
घास ओठी का हिच्या पण अडत आहे..
. 
पीक नाही थंड आहे चूल जरि ती  
आत्महत्येचा विचारच शिजत आहे.. 
. 
जीवनाला अर्थ ना पैशाविना या   
औषधावाचून तेही रडत आहे..
. 
शब्दही आधार ठरतो निर्धनाला  
शब्द विकुनी पोट त्याचे भरत आहे..
. 
खायला विष आज कोठे फुकट मिळते 
कोरडी भू आसवांनी भिजत आहे.. 
. 
तीनदा हुलकावण्या देऊन झाल्या 
न्यायला आता किती यम दमत आहे..
.