रात्रीत वाटपाची ज्याची चुणूक आहे.. [गझल]

वृत्त- आनंदकंद 
लगावली- गागाल गालगागा गागाल गालगागा 
मात्रा- २४ 
अलामत- ऊ ,    रदीफ - आहे 
-------------------------------------------------
रात्रीत वाटपाची ज्याची चुणूक आहे 
खुर्चीत "तो"च नेता होरा अचूक आहे 
.
दुष्काळ रोज आहे चारा न द्यावयाला 
दणक्यात नांगरावे जित्राब मूक आहे ..
. 
मागीतली जरी मी ना वाढते कुणी ती  
नित्कोर भाकरीची मज फक्त भूक आहे..
. 
दाता न ओळखीचा त्राता न पाळखीचा  
वर्दीतलाच टपला मज धाकधूक आहे ..
.
शेतात थेंब नाही घामास दाम नाही   
मरणे पसंत करतो जगणेच चूक आहे ..
.