इति प्रेमपुराण संपले

     
                         तिच्यावर त्याचे चॉकोप्रेम
                         त्याच्यावर तिचे कॅडप्रेम
                                   जागत होता तिच्याचसाठी
                                   जगात होती त्याच्याचसाठी             
                         दु:ख काहीच ठाऊक नव्हते 
                         सुखात दोघे डुंबत होते !
                                   आले कधी जर त्याचे डोळे
                                   तिचेच डोळे पाणी गाळे !
                         हासत खेळत आनंदाने
                         मजेत जीवन चालू होते    
                                   जिवापाड ते प्रेम तयांचे     
                                   तहानभूकही विसरायाचे
                         त्या प्रेमाला दृष्ट लागली...
                         सुमुहुर्ताची ओढ लागली !
                                   इति प्रेमपुराण संपले     
                                   -त्या दोघांचे 'लग्न' लागले !
                         लग्नाची ही चूक तयांची
                         वाताहत जी दोन जिवांची     
                                   प्रेम संपुनी घरपण आले
                                   रांधा वाढा सुरू जाहले !
                         सुरू जाहली जगरहाटी  
                         जीवन वैवाहिक ललाटी
                                   नवरा नवरी जगू लागले
                                   असामान्य सामान्य जाहले !

कोणत्याही टिप्पण्‍या नाहीत:

टिप्पणी पोस्ट करा