साजणे

वर्दी मिळता तुझी साजणे
गंध पसरला जाईजुईने ..


हळूच हसला कसा मोगरा
बघुनी मुखडा तुझा साजणे ..
 

पहा लाजली मनी अबोली
मान हलवते संतोषाने ..

तुझी लागता चाहुल आता
चाफा डोलतो आनंदाने ..

गुलाब झाला वेडा का तो
रंगुन गेला लालीम्याने .. 

प्राजक्ताने सडा टाकला 

श्वेत केशरी बघ रंगाने  ..

निशिगंधाचे भान हरपले
झुलतो आहे बेहोषीने ..

गुलमोहर ग आला फुलुनी
पसरत आहे चार दिशेने ..

जास्वंदी झाली आनंदी
टवटवली ती हिरवी पाने ..   

ब्रह्मकमळ बघ सुखावले
बहुत दिसांच्या विश्रांतीने ..

गेली बहरुन बाग ही सारी
केवळ तुझिया आगमनाने ..


अद्भुत लीला सखे साजणे
जग फुलते बघ चैतन्याने .. 


निसर्ग सगळा हसू लागतो   
सखे साजणे, 
तू आणलेल्या श्रावणाने ..!
.

कोणत्याही टिप्पण्‍या नाहीत:

टिप्पणी पोस्ट करा