हात टेकवून फरशीवर
गुडघे वाकवून, पाठ वर
बाबाघोडा होई तयार
वरती बंटी घोडेस्वार ..
घोडा होता हुषार फार
घरभर फे-या मारल्या चार
घोडा पळाला जोरात
उड्या मारल्या दारात ..
स्वार म्हणे, अरे हळूहळू
घोडा म्हणे, जोरात पळू
घातली घोड्याने मांडी
स्वाराची उडाली घाबरगुंडी ..
स्वार ओढे कानांचा लगाम
घोड्याला फुटला हो घाम
धपकन घोडा खाली पडला
स्वार आईच्या पदरी दडला ..
.
कोणत्याही टिप्पण्या नाहीत:
टिप्पणी पोस्ट करा