हे असेच चालायचे

सत्तेच्या लोण्यासाठी
बोके सगळे टपून बसलेले
नातीगोती विसरून सारी
वंशपरंपरेस जपलेले --

तुझे किती माझे किती
डरकाळ्या गुपचूप मारत
घोषणांच्या खिरापती
मतदाराला मूर्खात काढत --

कुणा न कसले सोयरसुतक
जनतेच्या सुखदु:खाचे
सत्ता खुर्ची मलाच मिळो
नाव टिको वारसदाराचे --

आपसात लढाया जीवघेण्या
चालू ठेवती अनुयायांच्या
एसीत बसुनी गप्पाटप्पा
बढाया पूर्वज मर्दुमकीच्या --

पाट वाहती रक्ताचे
अनुयायी पण निष्ठेखातर
मजेत नेते बघत राहती
खुर्चीसाठी पक्षांतर --

आंधळी जनता डोळस नेते
खड्ड्यात पडता बघती जेते
मजेत हसती मजेत राहती
मतामतांचे खणून रस्ते .. !
-