ठेऊन झोपतो मी स्वप्नासही उशाशी - [गझल]

वृत्त- आनंदकंद 
लगावली- गागालगालगागा  गागालगालगागा 
मात्रा- २४ 
 - - - - - - - - - - - - - - - - - - - - - - - - - - -

ठेऊन झोपतो मी स्वप्नासही उशाशी
तू भेटशील तेव्हां आशा मला जराशी..

दु:खात काळजीला बाजूस सारतो मी  
स्वप्नातल्या सुखाला कवटाळतो उराशी..

सारा सुखात आहे हा देश आज माझा 
शहरातले तुपाशी शेतातले उपाशी..

का पीक घोषणांचे उगवे सभेत त्यांच्या 
आशाळभूत आम्ही होतो किती अधाशी..

उपदेश छान करती ज्ञानी सुजाण येथे  
कर्तव्य टाळण्याचे ठरवूनिया मनाशी.. 
.