गर्दीत लागलेले - [गझल]

वृत्त- आनंदकंद 
लगावली- गागाल गालगागा  गागाल गालगागा 
मात्रा- २४ 
------------------------------------------------------
गर्दीत लागलेले धक्के चुकून माझे 
विसरून तीच गेली ध्यानी अजून माझे ..
.
या कोरड्या करांनी केले कितीक ओले 
तेव्हाच काम झाले त्यांच्याकडून माझे ..
.
का वाचता तुम्ही या कोऱ्याच चेहऱ्याला -
काळीज अनुभवांनी भरले लिहून माझे ..
.
खड्ड्यास पाहुनीही देतो न दोष कोणा  
त्यानेच आज पडते पाउल जपून माझे ..
.
गेलास तू तसा का बघता न आज मजला 
आले सख्या किती रे डोळे भरून माझे ..
.
प्रेमात गुंतलो मी तुझिया कसे ग सांगू 
ते पाठ शब्द सारे गेले थकून माझे ..
.
होतो जिवंत तेव्हा टाळून जात होते  
खांद्यावरी निघाले शव हे सजून माझे ..
.
होता भणंग कोणी भूखंड आज त्याचे 
नेता बघून गेले डोळे दिपून माझे ..

.