जाहली आहे तयारी - [गझल]

जाहली आहे तयारी आज पोळी भाजण्याची
बस तवा तो बघत आहे वाट आता तापण्याची..

का उगा भांडे लपवतो ताक त्याला पाहिजे जर
वेळ आहे बेधडक ही पाहिजे ते मागण्याची..

सारखे त्याच्या घड्यावर कोण पाणी ओततो रे
पालथा आहे घडा तो गरज त्याला सांगण्याची..

येत कानामागुनी जर तिखट होते खूप कोणी
गाठ नावडतीस संधी मीठ अळणी बोलण्याची..

कोरडा पाषाण आपण बनवतो लोकास ज्ञानी
गाठुनी खिंडीत त्याला बोल भाषा ठोकण्याची..
.

[ शब्दगांधार ... दिवाळी अंक २०१७ ]