जे जे मनात माझ्या- [गझल]

जे जे मनात माझ्या ते ते तुलाहि वाटे 
जुळण्यास संधि आहे फोडू नकोस फाटे

आहेस चांदणी तू मी चंद्र ना जरी तो 
मी काजवा ग जेव्हा अंधार फार दाटे

फुलता गुलाब गाली नजरा तुझ्यासभोती 
ना गप्प राहता मी टोचेन शब्दकाटे

लाजाळु एक तूही निवडुंग मी असा हा 
दोघात साम्य आहे एकांत छान वाटे

सौदा कधी न होतो प्रेमात प्रेमिकांचा 
निर्व्याज प्रेम पाही ना फायदे न घाटे ..
.

[ ज्ञानामृत.. ई दिवाळी अंक- २०१५ ]