कवितेचे इंद्रधनुष्य

पहिली माझी कविता हो
बायकोने वाचली
कविता वाचत आनंदाने
घरभर ती नाचली..

दुसरी माझी कविता हो
मातोश्रीने वाचली
समाधानाने मान हलवत
पोथीत मान घातली..

तिसरी माझी कविता हो
पिताश्रीनी चाळली
चाळत चाळत अख्ख्या चाळीत
कौतुकाने फिरवली..

चौथी माझी कविता हो
मित्रमंडळी आनंदली
एकमेकांनाच व्हाटसपावर 
रात्रंदिवस फॉरवर्डली..

पाचवी माझी कविता हो
पोरापोरीत मिरवली
चढाओढीने सगळ्यांनी 
आपल्या वहीत खरडली..

सहावी माझी कविता हो
प्रेयसीच्या हाती पडली
अर्धीच लिहिली होती तरी
"अय्या..छान.." पुटपुटली..

सातवी माझी कविता हो
मी स्पर्धेसाठी पाठवली
परिक्षकांनाही समजली नाही
त्यामुळे "सर्वोत्तम" ठरली !
.