कधी न पाहतो, इकडे-तिकडे
सत्ता जिकडे, मीही तिकडे
डोक्याला मुळी ताण न देता-
अंधानुकरण करणे..
माझे पक्ष बदलणे // धृ //
मी यांचा..कधी होतो त्यांचा..
खुशाल मजला म्हणोत चमचा
फिकीर कुणाची कधी न करता-
लांगुलचालन करणे.. //१//
सत्ता मिळता,लाथ झाडतो
प्रसंग पडता,पळहि काढतो
शिविगाळीला कधी न डरता-
खुर्चीलाच चिटकणे.. //२//
संधी साधुन,गळ्यात पडतो
संधी मिळता,गळा पकडतो
पक्षशिस्त बाजूस सारता-
नित्य पुढे मिरवणे.. //३//
लाचलुचपती-वशिला-पैसा
सुरेख संगम होता ऐसा
केस वाकडा कुणी न करता-
हात स्वच्छ राखणे.. //४//
मान मिळो,अपमान मिळू दे
मज दुस-यांची लाळ गिळू दे
टोपीची ती हांजी करता-
नवा पक्ष हुडकणे.. //५//
कोणत्याही टिप्पण्या नाहीत:
टिप्पणी पोस्ट करा