तो -

तो 

फेसबुकाच्या बाजारात

आपल्या पोस्टी मांडून बसतो---

येणाऱ्या जाणाऱ्या
आपल्या हजारो मित्रांकडे
आशाळभूतपणे पाहतो...

मिळतो का एखादा लाईक देणारा---

भेटतो का कुणी कॉमेंट देणारा...

येतो का कोण पुढे शेअर करणारा---

दिसतो का एखादी स्माईली टाकणारा...

..... बाजार उठण्याची वेळ होते !

तो -

पोटापुरता अपेक्षित गल्ला तरी,
गेलाबाजार जमला की नाही,
याची चाचपणी करतो---

निराशेने स्वतःशीच मुंडी हलवतो .....

पुढल्या बाजारात ठेवायच्या पोस्टची आखणी करत,
निद्रादेवीची आराधना करायला लागतो ...
.