वळ छडीचे मास्तरांच्या --[गझल]

वळ छडीचे मास्तरांच्या उमटले माझ्या मनावर
प्राक्तनाला जाणले त्यांनीच का माझ्या करावर ..

लाटुनी पैसे सुखाची झोप ना नेत्यास येते
कार्यकर्ता घोरतो पण कार्य अपुले संपल्यावर ..

"या सुखांनो जवळ माझ्या-" खूप दमलो साद घालत --
धावली दुःखे कशी ही भेटण्याला मज अनावर ..

झाड असता खंगलेले ना फिरकती पाखरेही
दिसुन येता बहरलेले झेप घेती तीच त्यावर ..

काम ना ते करत असती आस ना करण्यास पण   
शंख मोठा फक्त तोंडी काम फत्ते जाहल्यावर ..
.