होतो काढत आठवणींची चित्रे तिचीच मनात --[गझल]

होतो काढत आठवणींची चित्रे तिचीच मनात
गेली काही चित्रे पुसुनी ओघळत्या आसवात..

नजरेची पाखरे भिजू दे चिंब या एकांतात
मिटल्या अधरांची चालू दे कुजबूज अंधारात..

खिडकीत मनाच्या क्षणभर तू गेलीस डोकावून
का वाटले झळकला मजला चंद्रच काळोखात..

सुवासात भिरभिरतो वारा असतो दूरच गजरा
पण चाहुल का तिचीच लागे धडधडत्या हृदयात..

होता फुलला क्षणात गाली गुलाब तुझिया तेव्हा
घुसला पण नजरेचा काटा का माझ्या काळजात ..
.