जीवनगीत

चालायचे जीवनात 
असेच ठेच खात खात

कधी फुलात कंटकात 
जीवनगीत असेच गात

कधी मिट्ट काळोखात 
कधी लख्ख प्रकाशात

हिरव्यागारशा बहरात 
रखरखीत माळरानात

कधी मस्त सुगंधात 
कधी त्रस्त कचऱ्यात

आवडत्या सहवासात 
नावडत्या जमावात

छान कधी एकांतात 
भेसूर कधी आकांतात

गर्द सावलीत वनात 
रणरणत्या भर उन्हात

किलबिलत्या पाखरात 
घुबडांच्या चित्कारात

सळसळत्या चैतन्यात 
भळभळत्या वेदनात

नीतीच्या कुंपणात 
नियमांच्या वावरात

पुढेपुढेच नित्य जात 
जीवनगीत गात गात ..!
.

कोणत्याही टिप्पण्‍या नाहीत:

टिप्पणी पोस्ट करा