किती चांदणे छान बहरते .. [गझल]

मात्रावृत्त - अनलज्वाला ,  मात्रा- ८+८+८ 
अलामत- अ,  रदीफ- तू 
---------------------------------------------
किती चांदणे छान बहरते हसल्यावर तू 
रणरणते मग ऊनच उरते रुसल्यावर तू ..
.
लख्ख किती ती चमकधमक पण कुंदकळ्यांची   
वेधुन घेशी लक्षहि माझे असल्यावर तू ..
.
कधी कधी तू लवकर चिडशी लवकर निघशी 
बघत रहावे मला वाटते बसल्यावर तू ..
.
चेष्टा थोडी केल्यावर ती मुळी नावडे     
धमाल येते फुरंगटूनी नसल्यावर तू ..
.
खेळत असता तू एखादा डाव हारता
गोरीमोरी होशी पत्ते पिसल्यावर तू ..
.