झाला सराव इतका दु:खासही तमाचा -- [गझल]

वृत्त- आनंदकंद ,   मात्रा-  २४ 
लगावली- गागाल गालगागा गागाल गालगागा  
अलामत- आ ,  गैरमुरद्दफ 
-------------------------------------------------
झाला सराव इतका दु:खासही तमाचा 
वाटे प्रकाश आता अडसर मला सुखाचा..

लढतो जवान तिकडे जातीस विसरुनीया
नेत्यात चुरस इकडे हा कोण तो कुणाचा ..

तृष्णा कुण्या जिवाला प्राणावरीहि बेते
निर्जीव पत्थरावर अभिषेक हो दुधाचा ..

नाभीत कस्तुरी पण जाणीव ना तयाला
शोधात जीव होई हैराण त्या मृगाचा ..

स्वप्नात रोज भिजतो घेऊन मी सखीला
अन वास्तवात बघतो पत्ता न पावसाचा ..
..
[ ई साहित्य दरबार http://esahityadarbar.in च्या 
"दीपोत्सव २०१७" दिवाळी अंक]