भावनेला वाव नाही -- [गझल]

वृत्त- व्योमगंगा ,   मात्रा- २८ 
लगावली-  गालगागा  X  ४ 
रदीफ - आहे ,   अलामत- आ 
-----------------------------------------------------
भावनेला वाव नाही रोकडा शेजार आहे
माज पैशाचा इथे रे कोरडा आधार आहे..
.
कौतुकाला मौन आहे जीभ निंदेला पुढे ती  
खास काही माणसांचा बेरकी आजार आहे..
.
पाडुनीया चेहऱ्याला जोडतो माझ्या करांना   
वाटतो मी, फक्त त्याला "हा किती लाचार आहे"..
.
गुंतलेले दु:ख माझ्या जीवनी या पाहतो मी 
वाटते आता सुखाला भेटणे बेकार आहे..
.
खूप झालो मी शहाणा सारख्या खाऊन ठेचा 
पारखूनी सर्व नाती यापुढे घेणार आहे..
.