"अजून आहे लहान मी...!"

                        

                          नवे कपडे नवे बूट
                          पुन्हा तीच शाळा -
                          आजपासून पुन्हा
                          दप्तर करा गोळा !

                                   छान होती सुट्टी
                                   कित्ती कित्ती आराम
                                   रोज भोवताली गोळा
                                   राजा राणी गुलाम !

                          मित्र मैत्रिणी घालत
                          अवतीभवती पिंगा,
                          आईस्क्रीमच्या पार्टीचा
                          रोजचा धांगडधिंगा

                                   रात्री होई जागरण
                                   दुपारी खूप दंगा -
                                   अभ्यासाचा मुळीच
                                   पाठीशी नव्हता भुंगा

                          अस्सू दे ना ग आई
                          शाळेला कायम सुट्टी
                          अजून आहे लहान मी...
                          अस्सू दे थोडा हट्टी ! 

"| पालखीच्या सोहळ्यात |"

                              नामामधे रंगलो मी, ध्यानामधे गुंगलो मी
                              माउलीत दंगलो मी, पालखीच्या सोहळ्यात |
 
                                                     ओठी विठ्ठलाचे नाम, पाठी विठ्ठलाचे धाम
                                                     चित्ती विठ्ठलच ठाम, पालखीच्या सोहळ्यात |

                              कुणी गातसे अभंग, कीर्तनास चढवी रंग
                              तो सुटेना संतसंग, पालखीच्या सोहळ्यात |

                                                     एकमेका आलिंगूनी, सर्व जाऊ आनंदूनी  
                                                     भक्तिरसात न्हाऊनी, पालखीच्या सोहळ्यात |

                              धावे सांजवेळी गाय, तैसे ओढतात पाय
                              डोळ्यांपुढे विठूमाय, पालखीच्या सोहळ्यात || 

... पाऊसगाणे ...

                                 धरतीची आस
                                 होउनी उदास
                                 अंतरी भकास
                                 प्रार्थिते देवास 

                                                हजार डोळे
                                                आभाळास पहाती
                                                निष्प्राण होउनी
                                                केविलवाणे होती

                                 आस ती मनास
                                 गावे पाऊसगाणे
                                 मनांत रोजचेच 
                                 पाण्याचे रडगाणे

                                                मना लागलीसे
                                                धरतीची ओढ
                                                कोसळे आभाळ
                                                पाऊस होऊन

सुप्रभात .. शुभ रजनी ...

                                 सुप्रभात .. शुभ रजनी ...
                                 कशासाठी दोस्त ?

                                                      अफजलगुरू कसाब 
                                                      मजेत मस्त

                                 आपण महागाईने
                                 नेहमीच त्रस्त

                                                      गृहिणी टंचाईत
                                                      नित्य चिंताग्रस्त

                                 सामान्यांची स्वप्ने
                                 धुळीत उध्वस्त

                                                     नेतेमंडळीचे दौरे
                                                     कायम जबरदस्त

                                 जनतेची कमाई  
                                 दलालाकडून फस्त

                                                     सभागृह नेहमी
                                                     गोंधळातच व्यस्त 

                                 गुड मॉर्निंग... गुड नाईट...
                                 कशासाठी दोस्त ?

" तो एक पदर मायेचा ..."

                     तो एक पदर मायेचा
                     आधार किती आईचा

                                    वादळात सामर्थ्याचा
                                    भयमुक्ती उपदेशाचा
                                    नजराणा संस्काराचा

                    संदेश शांत जगण्याचा   
                    रागास शांत करण्याचा
                    मस्तकास थापटण्याचा

                                    तो दर्शक  सन्मार्गाचा
                                    तो रक्षक कल्याणाचा
                                    तो पूजक सौंदर्याचा 

दोन चारोळ्या -

१.
                      अनोळखी वाटेवर क्षणभर
          
                               भेटुन जाई राजकुमार -
            
                                      नाही दिसला पुन्हा जरी तो
              
                                              ओढ तयाची का अनिवार !




२.
                    मिठीत तुझिया विसावतो मी -
                      
                          म्हणू लाडके कसे तुला ?
                          
                                चवळीची तू शेंग बारकी ,
                               
                                      दुधी टम्म मी फुगलेला !



.

आयुष्य

                                   आयुष्य मी चालत आहे ,

                                    सोबतीला चंद्र चांदण्या -

                                      मी नाही कंटाळलो,

                                        बिचारा चंद्र मूक राहिला !

                                          पाठवून दिले त्याने

                                            माझ्या सोबतीला -

                                              विनातक्रार शांतपणे 

                                                किरणांसवे सूर्याला !

                                                    ...आता मला सोबत करताना  

                                                       सूर्य भलताच तापला आहे !    

एप्रिल फूल -

                               रंग नाही, रूप नाही, 
                               सुगंध नाही
                               पान नाही, पाकळी नाही, 
                               देठही नाही -

                               अजबसे फूल, देते हूल, 
                               कुठे दिसेना
                               आकर्षण आहे 
                               तरी तयाचे सर्वांना ;

                               फजितीत फसवते, 
                              स्वत:लाच हसवते
                               एप्रिलमध्येच कसे 
                               नेमके बघा उगवते -    
        
                              एक तारखेचे "एप्रिल फूल" 
                             भारी जीव जडवते,
                              मी मी म्हणणाऱ्याची खिल्ली 
                              पाहता पाहता उडवते !

" स्वप्नामधली जमाडीजंमत "

               कावळा करतो कुहू कुहू
               कोकिळा करते काव काव
               फोडते मांजर डरकाळी
               वाघोबा करतो म्याव म्याव

                                पळे सर सर सर हत्ती
                                निवांत चाले हळू खार ती
                                कोल्होबा चिडीचूप बसतो 
                                ससोबा गुरगुरगुर करतो                 

               आरोळी उंदीरमामाची ती   
               वनराजाला वाटे भीती          
               माकड चाले जमिनीवर 
               कासवाची उडी झाडावर
   
                                 आई छान सांगते गंमत  
                                 बंडू ऐके पेंगत पेंगत
                                 रंगुनी जाई बघत बघत
                                 स्वप्नामधली जमाडीजंमत                    

" चार चारोळ्या - "

       

                             आपुले मरण -

                                      खांदा देण्या कितिदा गेलो
                                      इतक्या वेळा मी गेलो -
                                      आपल्यासाठी उरले कोणी
                                      ... पहावयाचे विसरून गेलो ! |१|

                                                      

                                                प्रेमाची तारीख  -                 

                                                          एक तारखेची गंमत असते
                                                          आमच्या प्रेमा भरती येते -
                                                          माझ्या नयनीं पत्नी असते
                                                          तिचिया नयनीं वेतन असते ! |२|

                                  

                         चोहीकडे कचरा -

                                    कचरामुक्त जगास बघावे
                                    ध्यास मनीं जरि धरतो -
                                    अशक्य मजला परि वाटते,
                                    जोवर मी लेखन करतो ! |३|

                                                    

                                               हीरो -           

                                                        सावलीतही गॉगल लावून
                                                         हीरो बनण्या गेलो ,
                                                         ' डोळे नाहीत आले- '
                                                         सांगत घामाघूम झालो ! |४|

                      

 (पूर्व प्रसिद्धी: हास्यगाssरवा २०१२)