स्वातंत्र्याची भीती ....

स्वातंत्र्याची भीती .....

स्वतंत्र माझा देश जाहला, मी वर्णावा किती ,
इतकी वर्षे झाली , का वाटे स्वातंत्र्याची भीती !

धांगडधिंगा-गदारोळ तो दिसतो टीव्हीवरती,
लोकशाहीचे लक्तर लोंबत हसते वेशीवरती !
हर्ष होतसे बेकारांना, जवळी येता निवडणूक ती
निवडुन येता परि ते नेते कोठे पसार होती ?

कुणीहि परके घरात घुसती, स्वगृह समजून
घातपात अन गोळिबार ते करती, ना लाजून !
फाशी झाली तरि ते जगती, निवांत झोपून
तोड-फोड ती आम्ही पाहतो निद्रानाशातून !

भूखंडातही घोटाळे नि लाचखोरि करि बेजार
महागाई अन स्वाईन-फ्लूचा वाढतसे आजार !
निकालाविना तुंबित खटले पुढे सरकणार ....
कुंठित होते मति- पाहुनी लाल फीत व्यवहार !

अमर जाहले थोर हुतात्मे , झेंडे मग फडकती !
फ्लेक्सावर झळकण्यात नुस्ते गेंडे का गुंगती !!
स्वतंत्र माझा देश जाहला, मी वर्णावा किती ,
इतकी वर्षे झाली, का वाटे स्वातंत्र्याची भीती !