" शिवबा, नकोस जन्म कधी तू इथे पुन्हा घेऊ -- "

शिवबा, नकोस जन्म कधी तू इथे पुन्हा घेऊ
राजकारणी पक्के आम्ही जयघोषात रमत जाऊ ..


कर्तव्याची जाणिव नाही, हक्कासाठी मरू आम्ही
कृती न करता बडबड करणे- ध्येय ठेवले हे आम्ही  .. 


एकीचे बळ सर्व जाणती, होण्यासाठी आनंदी
फाटाफुटीत रमून बघती, स्वार्थ साधण्याची संधी .. 


शिवबा, तू जन्मलास ह्या पवित्र मातीवरी जरी
राजा होणे पुन्हा न नशिबी, धूर्तमंडळी सारी ..  


शिवबा, तुजसाठी मरणारे उरले ना मावळे
संधीसाधू लुच्चे आता सगळे डोमकावळे ..


नावाचा जयघोष तुझ्या तो चालू सांजसकाळी
"तुझ्यासवे फ्लेक्सावर झळकू" ऐकू ये डरकाळी ..


म्हणतो आहे स्वत:स जो तो, "शिवबाचा अनुयायी"
सत्ता खुर्ची पदाचसाठी करतो रोज लढाई ..


हद्दपार झालास कधीच- तू त्यांच्या मनातुनी
"माझा शिवबा" दिखावाच तो दिसतो
क्षणोक्षणी ..

वेगवेगळे मोर्चे, जयंत्या- फुकाचाच तो नारा
गेलो कंटाळून बघूनी त्यांचा नाटक नखरा ..


धडपडताना दिसतो जो तो, मिरवत आपला तोरा
शिवबा, करतो मनापासुनी मी मानाचा मुजरा .. !
.

कोणत्याही टिप्पण्‍या नाहीत:

टिप्पणी पोस्ट करा