द्यावे म्हणतो संस्कारांचे ओझे फेकुन - - [गझल]

द्यावे म्हणतो संस्कारांचे ओझे फेकून नीतीनियमांना मी दमलो आहे पाळून.. . जाते पळुनी विझताच दिवा छाया तेथून नाद न करता नाणी सरते नाते जवळून.. . गेली वाढत सलगी माझी दारिद्र्याशी गेले अंतर नात्यामधले आता वाढून.. . असा कसा मी जातच विसरुन माझी गेलो बघता बघता माणसातही गेलो मिसळुन.. . नाही झेपत आता कौतुक ऐकायाला गेली आहे निंदा रोजच कानी साठून.. . झाली दु:खी काळोखाची खूप सवय मज पडता भवती तिरिप सुखाची बघतो दचकून.. . मात्रा गण मी मोजत हसलो शोधत फसलो चोरशिपाई खेळत बसलो मी गझलेतून.. .