शब्द ..शब्द .. शब्द ..

                       


                                                              शब्दांच थैमान
                                

                               डोक्यातल्या कप्प्यातून
                                     

                                                     घुटमळतात शब्द
                                              

                                                                             तेच मनांत कधीपासून -
                                                  

                                                    डोकावतात
                                               

                                                                      संधी साधत बेटे
                                                                  

                                       लेखणीतून घरंगळत
                                 

                                                                       पहुडतात कागदावर
 

                                                                                                     कविता बनून !

अनपेक्षित ...

काहीतरी चांगल पोस्ट करायला जातो,
 

नेमकी एरर समोर येते आणि आपण काहीतरी करण्याआधीच पोस्ट अपडेट होते
.. अनपेक्षित पेचातून सुटका !
 

पोस्टला कुणी लाईक केले आहे का पहातो, तो पोस्टला चार शेअर दिसतात
.. अनपेक्षित आनंदाचा झटका !
 

रस्त्यातून जाताना पुढच्यास ठेच- म्हणून शहाणा व्हायला जातो,
तर आपल्याला ठेचच लागत नाही तर आपण नेमके समोरच्या खड्ड्यात पडतो
.. अनपेक्षित शहाणपणापणाला फटका !
 

वाहतुकीचा सिग्नल तोडून पुढचे दोघे भरधाव निघाले की,
आपणही 'प्रयत्न' करायला जातो आणि नेमके 'त्या'च्या तावडीत सापडतो
.. अनपेक्षित प्रयत्न लटका !
 

बायकोला फोन करून खूष करण्यासाठी सिनेमाची तिकीटे घेऊन गेल्यावर,
समोरच घरात पाहुणे आलेले दिसतात
.. अनपेक्षित बायकोशी उडणारा अबोल्याचा खटका !
 

जमा झालेले मासिक वेतनच पाहायला जातो,
तेव्हां अचानक कसलातरी जुना फरक जमा झालेला दिसतो
.. अनपेक्षित लागलेला मटका !
 

ह्या आणि असल्या अनपेक्षितपणाने आयुष्यात घडणाऱ्या घटनामुळे तर जीवन सुसह्य अथवा असह्य होते ..
जगणे जगणे म्हणतात, ते असल्या झटक्या-फटक्यांमुळे तर जगावे वाटते.
.. नाहीतर जीवन नीरसच !
 

पटतंय का ?

जुनी गोष्ट...

                चिमणे चिमणे दार उघड, म्हणत कावळा थांबत होता 
                बाळाला तीट लावत लावत.. चिमणीचा वेळ जात होता    

                शेणा-मेणाच्या त्यांच्या घरात पाऊस दंगा करत होता 
                बाळ मजेत आईच्या कुशीत, रंगीत स्वप्नात शिरत होता !

                ..पावसाची वाट पहात पहात, चिमणी खूपच थकली आहे
                दाराबाहेरच्या कावळ्याने, मान बाजूला टाकली आहे

                जुनी गोष्ट..नव्या पिढीतली आई बाळाला सांगत आहे
                बाबाचा जीव सिमेंटच्या घरांत वरखाली टांगत आहे !

दोन चारोळ्या

१.

मानवेल जर रुसुनी बसणे 

असेच तुजला क्षणोक्षणी ,

आवडेल मनधरणी करणे 

तुझी ग मजला क्षणोक्षणी..

.

२.
आले वादळ सुखाचे कधी 
माझ्या जीवनसागरी-
नेईन नाव मी दु:खाची 
सहज वल्हवत पैलतिरी..
.

देव वाटला- असुर निपजला !!

                           धर्म लाज संस्कार शरम
                           सोडुन बनला कसा नराधम -

                                           फासुन व्यवसायास काळिमा 
                                           पैसा-पैसा करसी अधमा !

                           अर्भक दिसले- शस्त्र उचलले  
                           माणुसकीचे नांव न उरले !

                                           जिरला टाहो गर्भातच तो
                                           माउलीस ना पान्हा फुटतो -

                           स्त्रीभ्रूणहत्या नित्य करावी
                           कशी कळावी मातृथोरवी !

                                          धन्य होतसे का तव माता -
                                          कृष्णकृत्य तव तिजला कळता ?

                           म्हणेल माता नक्की तुजला,
                           देव वाटला- असुर निपजला !!

तीन चारोळ्या ---

चाहूल वार्धक्याची -
हिरव्यागार वृक्षावरून 
घरंगळले एक पिवळे पान -
अंधुकशा माझ्या नजरेने 
पाहिले विसरून देहभान ..
.

घमेंड -
हातच्या मोगऱ्याच्या सुगंधाची
नसावी घमेंड कधी ती - 
मोहवते निवडुंगाचे फूलही कधीतरी 
असावी जाणीव मनी ती ..
.

आठवण -
हाती जुनी वही लागली
माझी नजर का हपापली -
जीर्णशी एक फूलपाकळी
आठवणीने तुझ्या चपापली ..
.

"अजून आहे लहान मी...!"

                        

                          नवे कपडे नवे बूट
                          पुन्हा तीच शाळा -
                          आजपासून पुन्हा
                          दप्तर करा गोळा !

                                   छान होती सुट्टी
                                   कित्ती कित्ती आराम
                                   रोज भोवताली गोळा
                                   राजा राणी गुलाम !

                          मित्र मैत्रिणी घालत
                          अवतीभवती पिंगा,
                          आईस्क्रीमच्या पार्टीचा
                          रोजचा धांगडधिंगा

                                   रात्री होई जागरण
                                   दुपारी खूप दंगा -
                                   अभ्यासाचा मुळीच
                                   पाठीशी नव्हता भुंगा

                          अस्सू दे ना ग आई
                          शाळेला कायम सुट्टी
                          अजून आहे लहान मी...
                          अस्सू दे थोडा हट्टी ! 

"| पालखीच्या सोहळ्यात |"

                              नामामधे रंगलो मी, ध्यानामधे गुंगलो मी
                              माउलीत दंगलो मी, पालखीच्या सोहळ्यात |
 
                                                     ओठी विठ्ठलाचे नाम, पाठी विठ्ठलाचे धाम
                                                     चित्ती विठ्ठलच ठाम, पालखीच्या सोहळ्यात |

                              कुणी गातसे अभंग, कीर्तनास चढवी रंग
                              तो सुटेना संतसंग, पालखीच्या सोहळ्यात |

                                                     एकमेका आलिंगूनी, सर्व जाऊ आनंदूनी  
                                                     भक्तिरसात न्हाऊनी, पालखीच्या सोहळ्यात |

                              धावे सांजवेळी गाय, तैसे ओढतात पाय
                              डोळ्यांपुढे विठूमाय, पालखीच्या सोहळ्यात || 

... पाऊसगाणे ...

                                 धरतीची आस
                                 होउनी उदास
                                 अंतरी भकास
                                 प्रार्थिते देवास 

                                                हजार डोळे
                                                आभाळास पहाती
                                                निष्प्राण होउनी
                                                केविलवाणे होती

                                 आस ती मनास
                                 गावे पाऊसगाणे
                                 मनांत रोजचेच 
                                 पाण्याचे रडगाणे

                                                मना लागलीसे
                                                धरतीची ओढ
                                                कोसळे आभाळ
                                                पाऊस होऊन

सुप्रभात .. शुभ रजनी ...

                                 सुप्रभात .. शुभ रजनी ...
                                 कशासाठी दोस्त ?

                                                      अफजलगुरू कसाब 
                                                      मजेत मस्त

                                 आपण महागाईने
                                 नेहमीच त्रस्त

                                                      गृहिणी टंचाईत
                                                      नित्य चिंताग्रस्त

                                 सामान्यांची स्वप्ने
                                 धुळीत उध्वस्त

                                                     नेतेमंडळीचे दौरे
                                                     कायम जबरदस्त

                                 जनतेची कमाई  
                                 दलालाकडून फस्त

                                                     सभागृह नेहमी
                                                     गोंधळातच व्यस्त 

                                 गुड मॉर्निंग... गुड नाईट...
                                 कशासाठी दोस्त ?