प्रेम तुझ्यावर बहुधा माझे जडते आहे -- [गझल]

प्रेम तुझ्यावर बहुधा माझे जडते आहे
बघता मी तुज नजर तुझी का झुकते आहे..
.
न जरी हल्ली ती मज कोठे दिसते आहे  
आठवणीच्या उदद्यानी मन रमते आहे..
.
प्रेम तिच्यावर बागेमध्ये करतो मीही 
नजर उगा का बघणाऱ्यांची जळते आहेे..
.
काळ किती ते नाही कळले बसलो आपण 
स्पर्शामधुनी संवादाला भरते आहे..
.
लपव खळी ती येताना तू गालावरची 
ना बोलाया सुचते मग मन रुसते आहे..
.

विजयकुमार देशपांडे

https://seemollanghan18.blogspot.com/…/%E0%A4%B5%E0%A4%BF%E…

चत्कोर भाकरीचा - [गझल]

चत्कोर भाकरीचा तुकडा शिळा मिळाला
जग हे मुठीत आले आनंद त्यास झाला..
.
कुरवाळते टफीला प्रेमे विशाल महिला   
हकलून त्या भुकेल्या दारात याचकाला.. 
.
का मंदिरात घुसती बेशिस्त माणसे ती    
धरुनी उभे भिकारी शिस्तीत वाडग्याला.. 
.
घेतो निजेस धोंडा खातो भुकेस कोंडा
मिरवीत तो भिकारी थाळीसही निघाला..
.
पैशात लोळतो पण चिंतेत रोज जळतो 
तो लोभ 'आणखी'चा जगण्यात भार आला..
.

" आरसा - - -" [गझल]

नक्कल माझी करी आरसा
दावी प्रतिमा खरी आरसा ..

डाव्याला तो करतो उजवा 
लबाड आहे तरी आरसा ..

मी हसलो तर तोही हसतो 
सुखात साथी करी आरसा ..

तडे मनाला जेव्हा जाती 
चरे दाखवी घरी आरसा ..

मी रडताना दु:खी तोही 
निर्जिव असतो जरी आरसा ..

समरस होई अपुल्यासंगे 
न दाखवीतो दरी आरसा ..

समोर जे ते नयनी पाही 
कास खऱ्याची धरी आरसा ..
.

द्यावे म्हणतो संस्कारांचे ओझे फेकुन - - [गझल]

द्यावे म्हणतो संस्कारांचे ओझे फेकून नीतीनियमांना मी दमलो आहे पाळून.. . जाते पळुनी विझताच दिवा छाया तेथून नाद न करता नाणी सरते नाते जवळून.. . गेली वाढत सलगी माझी दारिद्र्याशी गेले अंतर नात्यामधले आता वाढून.. . असा कसा मी जातच विसरुन माझी गेलो बघता बघता माणसातही गेलो मिसळुन.. . नाही झेपत आता कौतुक ऐकायाला गेली आहे निंदा रोजच कानी साठून.. . झाली दु:खी काळोखाची खूप सवय मज पडता भवती तिरिप सुखाची बघतो दचकून.. . मात्रा गण मी मोजत हसलो शोधत फसलो चोरशिपाई खेळत बसलो मी गझलेतून.. .

मरायला मी गेलो तिकडे - [गझल]

मरायला मी गेलो तिकडे 

आठवता तू आलो इकडे

.

दिसता पैसा हरती नाती
पायहि वळती वैभव जिकडे

.

वास फुलाचा हवेत शिरता
वळतो अंधहि अचूक तिकडे

.

उगवते कसे दुष्काळातहि
पिक अफवेचे पण चोहिकडे

.

दिसता पुसती मंदिरात मज
आज उगवला सूर्य कुणिकडे

.

बसतो पाहुन तिला तिथे मी
का सरते ती अजुन पलिकडे

.

विसरा जाती.. हळूच म्हणती
ना जातीचा सरक अलिकडे ..

.

सहज थांबलो कळीस बघून -- [गझल]

सहज थांबलो कळीस बघून 
का आली मी दिसता खुलून ..

दारात उभा असा अचानक 
धांदल तिचीच पडदा धरून ..

कळला रे तव होकार सख्या 
दारी तुझिया स्वागत झटून..

प्रवास अपुला एका मार्गे 
इकडुन माझा तुझा तिकडून ..

केली पूजा दगडाची मी 
बघत राहिला देवहि दुरून .. 
.

दमला दु:खे तो विकताना -- [गझल]

दमला दु:खे तो विकताना थंडीउन्हात सारी 
भलाबुरा ना कुणी फिरकला घेण्या ती बाजारी.. 
.
करण्या विक्री बसलो घेउन सुखास सगळ्या मीही 
टपले होते उचलण्यास ते उंदरास जणु घारी.. 
.
झोप न त्याला गादीखाली बेनामी ती माया  
घाम गाळुनी पसरे हा तर पथारीवरी दारी..
.
माझ्याइतका मीच शहाणा अन्य न दुसरा कोणी 
पाठ थोपटत करतो पारख स्वत:च अपुली न्यारी..
.
चार इयत्ता शिकला तो पण विनाकाळजी होता  
चालायाची पिढीजात ती निवडणुकीची वारी ..
.

पाठलाग का तुझाच करते -- [गझल]

पाठलाग का तुझाच करते 
हृदयही कसे मला न कळते..

मोह सुगंधी तव गजऱ्याचा
श्वासालाही मन गुंगवते..

डोळे माझे टकमक बघती
पाठीवर ती नागिण डुलते..

वळणावरती थांबतेस तू
मन माझे का तिथे धावते..

आठवणी मी तुझ्या काढतो     
उदासवाणे मन हुरहुरते..
.

खूप मीही नवस केले-- [गझल]

खूप मीही नवस केले देव ना मज पावतो 
आस वेडी भाव वेडा मग भयाने पूजतो..
.
चोर तो का साव आहे ओळखू त्याला कसा 
आरसा बघताच मी मज चेहरा जो दावतो..
.
सारवासारव तुझी त्या चालते पदरासवे 
हेतु डोळयांना समजता उघडझापी टाळतो.. 
.
फूल हाती मज दिलेे हे आज प्रेमाने तिने 
निर्दयी काटा हळू का मज हसूनी टोचतो.. 
.
पीठ जातींचे दळूनी काढले जात्यातुनी 
पण पिठाला जात कुठली प्रश्न आता त्रासतो ..
.
माज मस्ती आणि गुर्मी यात मुरलेला गडी 
राख पण ठरल्या ठिकाणी व्हायची का विसरतो..
.

ऊन आले ओसरीवर-- गझल

ऊन आले ओसरीवर 
सावली ना झोपडीवर..
.
हाल सांगू मी कुणाला 
स्वप्न ना पडते भुईवर..
.
शेंदणे मज जीवनी या 
नजर त्यांची बिसलरीवर..
.
घोरती ते, घोर मजला 
या कुशीवर त्या कुशीवर..
.
दाम मिळतो घाम गळता- 
ऐतखाऊ ते भिशीवर..
.
रंक राबे भूक विसरत 
ताव रावाचा मिशीवर.. 
.